Á tólfta tímanum í morgun voru björgunarsveitirnar Dagrenning á Hvolsvelli, Flugbjörgunarsveitin Hellu og Björgunarsveitin Bróðurhönd undir Eyjafjöllum boðaðar út á mesta forgangi vegna tilkynningar til Neyðarlínunnar um ferðamann sem hafði fallið niður nokkurn bratta á leið að Merkurkeri við Þórsmerkurleið.
Viðkomandi hafði runnið niður um fjóra metra í brekku niður að Sauðá og var grunur um ökklabrot.
Björgunarfólk ásamt sjúkraflutningamönnum átti nokkuð greiða leið að viðkomandi, búið var um ferðamanninn í börum og björgunarfólk óð svo Sauðá með börurnar og gekk fram gilið, ríflega 100 metra að sjúkrabíl.
Slasaði ferðamaðurinn var fluttur með sjúkrabíl á slysadeild til aðhlynningar en björgunarsveitir höfðu lokið sinni vinnu á vettvangi upp úr klukkan 12.