Bensínfótur ferðalanga á Suðurlandi var heldur þungur í gær. Lögreglan í Vík hafði afskipti af sextán ökumönnum sem óku of hratt þar, 15 erlendum ferðamönnum og einum Íslendingi.
Allir þessir aðilar greiddu sektir sínar á vettvangi og námu þær samtals vel á aðra milljón króna.
Lögreglan á Suðurlandi segir að afskipti hennar af umferðinni hafi verið aukin verulega að undanförnu og standa vonir til þess að það leiði til fækkunar slysa.
Alls voru 345 einstaklingar kærðir fyrir að aka of hratt í umdæminu í janúar og febrúar. Á sama tíma í fyrra nam fjöldi kærðra 126.