Hin níu ára gamla Rannveig Gígja Ingvarsdóttir notast við heldur óvenjulegan fararskjóta til að komast í skólann sinn, Laugalandsskóla í Holtum. Rannveig Gígja, eða Gígja eins og hún er ávallt kölluð, kýs að ferðast á hestinum Hvin í stað þess að taka skólabílinn.
„Gígja hefur áður farið ríðandi á Laugaland en þá var hún í leikskólanum og mamman þurfti að koma með. Nú leggur hún sjálf á hestinn og ríður ein út og því var nokkuð auðsótt að skella sér ríðandi,“ segir Jóhanna Þorbjörg Magnúsdóttir, móðir Gígju, í samtali við sunnlenska.is.
„Fyrst fór hún með vini sinum Alexander sem er á gæðingnum Spaða, sem amma hans heitin átti, og svo í morgun lánaði hún vinkonu sinni Margréti Aþenu hestinn Þyt frá Gíslholti. Hennar hestur heitir svo Hvinur frá Ægissíðu og er 16 vetra og hún er með í láni frá stórvinkonum sínum Heiðdísi og Bryndísi.“
Gefur hestinum vatn í frímínútum
Þær mæðgur búa á bænum Köldukinn í Holtum, sem er fimm kílómetra frá skólanum. Jóhanna Þorbjörg er hrossaræktandi og byrjaði Gígja sjálf að sitja hest, án þess að vera í aukataumi, þegar hún var aðeins 4 ára. Jóhanna Þorbjörg segir að Gígja hafi aldrei verið jafn spennt fyrir skólanum og nú, þegar hún ferðast um á hesti.
„Krakkarnir í skólanum eru bara mjög jákvæðir og finnst þetta skemmtilegt. Hestarnir bíða í gerði sem er við veginn og hún fer í frímínútum og bætir á vatn í fötu fyrir þá. Hún hefur farið ríðandi í rigningu, roki, sól og logni og sennilega verður það bara myrkrið sem mun stoppa hana þegar líður á haustið,“ segir Jóhanna Þorbjörg ennfremur.
