Margir hafa kvartað yfir veðrinu þennan veturinn en Sunnlendingar hafa þó ekki þurft að kvarta yfir snjóþyngslum eins og þeim sem voru veturinn 1980 til 1981.
Örn Óskarsson, framhaldsskólakennari á Selfossi, birti skemmtilegar myndir á Facebooksíðu sinni nú í vikunni en þær voru teknar á Selfossi í mars árið 1981 og óhætt að segja að allt hafi verið á kafi í snjó.
„Sumir eru að býsnast yfir snjó og óveðrum núna í vetur. Ég mátti til með að skanna inn myndir frá því í marsbyrjun 1981 til að sýna alvöru snjóskafla hér á Selfossi. Þetta var síðasti veturinn hér um slóðir sem snjóinn skóf í almennilega skafla. Síðan hefur þetta verið ósköp rólegt,“ segir Örn í Facebookfærslu sinni.
Snjóþyngsli voru með eindæmum mikil á Suðurlandi þennan veturinn og í leysingum í lok janúar urðu meðal annars mestu flóð í Hvítá síðan 1965.
Vegurinn yfir Hellisheiði hefur líklega sjaldan eða aldrei verið jafn oft ófær og í byrjun árs 1981 en heiðin var þá lokuð meira eða minna frá janúar fram í mars. Skaflar meðfram þjóðveginum voru þá orðnir margra metra háir og snjóruðningstæki og blásarar höfðu í nógu að snúast.
Í lok mars 1981 birtist myndasyrpa með snjómyndum í Morgunblaðinu undir fyrirsögninni „Fer þessu ekki að linna?“, sama spurning og margir eru að spyrja sig í dag.
Fagurgerði skartar sínu fegursta í vetrarsólinni. Allt ófært. Ljósmynd/Örn Óskarsson
Grænuvellirnir og sýsluskrifstofan við Hörðuvellina fjærst á myndinni. Ljósmynd/Örn Óskarsson
Myndarlegir skaflar á Árveginum. Ljósmynd/Örn Óskarsson