Til að bregðast við aðstæðum við Múlakvísl hefur Bílaleiga Akureyrar opnað tímabundið tvær útleigustöðvar, annars vegar á Klaustri og hins vegar í Hrauneyjum.
Boðið er upp á rútuferðir á milli þessara tveggja staða um Fjallabaksleið nyrðri tvisvar á dag, klukkan 10:30 og 15:30 og er farið frá hvorum stað samtímis. Með þessu móti geta viðskiptavinir skilað bílum sínum á öðrum hvorum staðnum, tekið rútuna og fengið nýjan bíl þegar komið er á leiðarenda.
Þessi þjónusta er viðskiptavinum Bílaleigu Akureyrar að kostnaðarlausu þangað til bráðabirgðabrú yfir Múlakvísl verður tekin í gagnið.
“Það er óhætt að segja að viðskiptavinir okkar hafi sýnt aðstæðum skilning og tekið þessari lausn vel og líta margir á rútuferðina sem óvænt ævintýri,” sagði Steingrímur Birgisson, forstjóri Bílaleigu Akureryrar, í samtali við sunnlenska.is.
“Samkvæmt Eggerti Jóhannssyni aðgerðastjóra á Kirkjubæjarklaustri hafa nú þegar um eitthundrað farþegar nýtt sér þjónustuna og eru allir afar ánægðir með þessa lausn,” sagði Steingrímur og bætti við að ánægjulegt væri að sjá hversu hratt og örugglega Vegagerðin og björgunarsveitir hafi brugðist við þessum erfiðu aðstæðum og því mikilvæga verkefni að koma samgöngum um hringveginn sem fyrst í sem eðlilegast horf.