Eftirlitsfulltrúar vinnustaðaeftirlits ASÍ og stéttarfélaganna fengu fjandsamlegar móttökur frá eiganda veitingastaðar á Suðurlandi í síðustu viku, og reyndi hann að koma í veg fyrir að eftirlitsfulltrúar ræddu við starfsfólkið.
Þetta kemur fram í dagbókarfærslu á Facebooksíðu ASÍ.
Eftirlitsfulltrúum tókst að lokum að ræða við einn starfsmann staðarins og afhentu honum upplýsingabæklinga til að dreifa til samstarfsfólks síns. Ekki náðist að ræða við starfsfólk í eldhúsinu en þar starfa einstaklingar sem tala hvorki íslensku né ensku og grunur leikur á að þau fái ekki rétt laun. Vinnumálastofnun hefur verið gert viðvart og munu eftirlitsfulltrúar ASÍ kalla eftir launaseðlum og ráðningarsamningum starfsfólksins.
Auk þessarar heimsóknar ræddu eftirlitsfulltrúarnir við erlenda leiðsögumenn á jafnaðarkaupi, sem höfðu ekki fengið desemberuppbót, og voru þeir hvattir til að fá aðstoð stéttarfélags síns við að reikna út hver laun þeirra ættu að vera.