Féll í vatnið við inntak virkjunarinnar

Um klukkan 6:30 á sunnudag barst lögreglu tilkynning um tvo menn að príla utan í Ljósafossvirkjun við Úlfljótsvatn.

Starfsmaður virkjunnar fór að kanna málið og þá var annar mannanna á sundi í vatninu rétt við inntaksmannvirki virkjunarinnar. Hann komst á þurrt af eigin rammleik og varð ekki meint af volkinu.

Maðurinn, tvítugur að aldri, hafði hlaupið eftir flotgirðingu sem er á vatninu framan við inntakið. Ekki tókst betur til en að hann missti jafnvægið og féll í vatnið.

Mennirnir voru ölvaðir og gáfu þá skýringu að þeir hefðu verið þarna í rugli og ekki gert sér grein fyrir hættunni.