Þyrla Landhelgisgæslunnar sótti í kvöld konu sem slasaðist þegar hún féll af hestbaki að Fjallabaki.
Útkallið barst um klukkan 17 og sótti þyrlan konuna í Landmannahelli. Samkvæmt upplýsingum frá lögreglunni á Suðurlandi var konan var ekki talin alvarlega slösuð en þar sem veðrið var ekki upp á sitt besta og um langan veg að fara var ákveðið að kalla út þyrluna.
Björgunarsveitarfólk í hálendisvakt Landsbjargar var í Landmannalaugum og fór á vettvang slyssins. Björgunarsveitarfólk hlúði að konunni og bjó um hana fyrir flutning með þyrlunni.