Fékk 15 milljarða króna kröfu frá ríkinu

„Mér var alveg sama, mér fannst þetta bara fyndið enda hlýtur að vera um villu að ræða," segir Hólmfríður Erna Kjartansdóttir sem fékk 15 milljarða króna kröfu frá ríkinu í heimabankann sinn í dag.

„Ég skuldaði ríkinu 15.000 krónur en að fá 15 milljarða rukkun er kannski heldur ríflegt,“ segir Hólmfríður Erna, sem er einstæð móðir á Selfossi. „Þetta var bara mjög hressandi.“

Hólmfríður fær engan afslátt frá ríkinu á upphæðinni en auk 15 milljarðanna eru komnir vextir á kröfuna upp á 1.201 krónu. Þessi upphæð færi langleiðina með loka fjárlagagatinu hjá ríkisstjórninni, ásamt því að vera um helmingur áætlaðs verðmætis makrílkvótans í ár.

Í samtali við sunnlenska.is sagði Hólmfríður ólíklegt að hún myndi greiða kröfuna en hún átti eftir að hafa samband við skattyfirvöld til að fá skýringar á henni.