Hveragerðisbær efnir til sameiginlegs hreinsunar- og fegrunarátaks næstu vikuna, dagana 13.-19. júlí, og hvetur alla bæjarbúa til að leggjast á eitt við að gera bæinn hreinan og fínan.
Hveragerðisbær fagnar 80 ára afmæli á árinu og því er sérstakt tilefni til að leggja áherslu á snyrtilegt og aðlaðandi bæjarumhverfi. Hvert handtak skiptir máli, hvort sem verkefnið felst í að tína rusl, snyrta gróður, fjarlægja garðaúrgang, laga til við lóðina, losna við gömul bílhræ eða mála.
Gjaldfrjálst á gámasvæðinu
Gjaldfrjálst verður fyrir almenning á Gámasvæði Hveragerðisbæjar alla vikuna og aukaopnun á sunnudeginum 19. júlí kl. 12-16.
Ráðgjöf við förgun stórra hluta
Áhaldahús Hveragerðisbæjar mun aðstoða eða veita ráð til að fjarlægja stóra eða þunga hluti svo sem bílhræ, vélarhluti, trampólín, gamla þvottavél sem stendur úti, tunnu af olíu eða annað slíkt, eigendum að kostnaðarlausu. Hægt er að hafa samband við bæjarskrifstofuna til að óska eftir aðstoð.
Rusl á víðavangi
Þeir sem tína rusl á víðavangi geta haft samband við áhaldahús og starfsmenn þaðan sækja ruslið. Það á sérstaklega við um það sem er stórt, í miklu magni eða þess eðlis að heppilegra sé að starfsmenn bæjarins sæki.
Þá óskar Hveragerðisbær eftir nafnlausum ábendingum um þau svæði þar sem bæta mætti umhirðu og ásýnd. Ábendingar fara til áhaldahúss og garðyrkjudeildar til úrvinnslu.
Íbúar eru hvattir til að taka myndir í vikunni, fyrir og eftir tiltekt, og deila á Instagram með myllumerkinu #FagraHveragerði