Meirihluti Framsóknar og óháðra í Mýrdalshreppi hyggst lækka álagningarhlutfall fasteignaskatts á íbúðarhúsnæði í haust.
Þetta kemur fram í tilkynningu á Facebooksíðu framboðsins.
„Fasteignaverð í sveitarfélaginu hefur hækkað mjög á síðustu árum. Þróunin ber þess vitni að fleiri vilja búa í sveitarfélaginu, sem er jákvæð þróun. Fylgifiskurinn eru hærri fasteignagjöld ef álagningarprósentan er óbreytt,“ segir í tilkynningu B-listans.
„Stefnan okkar var skýr – íbúar eiga ekki að bera stóraukinn kostnað af hækkun fasteignaverðs. Þess vegna munum við lækka álagningarhlutfall fasteignaskatts á íbúðarhúsnæði í haust.“