Tveir dönskukennarar við Grunnskólann í Hveragerði, Heimir Eyvindarson og Sigríður Sigurðardóttir, hafa verið að þróa aðferðir til þess að nota farsíma í dönskukennslu.
Meðal þess sem þau hafa bryddað upp á í kennslunni er farsímaratleikur, forsetningaganga og fleira nýstárlegt.
Nú hefur verið opnaður vefur á Tungumálatorgi í samvinnu við Tungumálaver, Félag dönskukennara, Félag norsku- og sænskukennara og Else Brink Nielsen fyrrverandi rejselærer. Vefurinn ber heitið Mobilen i sprogundervisningen og er að mestu byggður á hugmyndum Heimis og Sigríðar.
Efnið sem birt er á síðunni er bæði á íslensku og dönsku og miðar að því að nemendur fái tækifæri til samskipta á tungumálinu í „raunverulegum“ aðstæðum utan kennslustofunnar með því að nýta farsíma og rafræna miðla til að senda og taka við smáskilaboðum og munnlegum skilaboðum á öðru tungumáli.
Efnið er fyrst og fremst ætlað kennurum og hefur það að markmiði að kynna námsaðstæður þar sem nemendur og kennari eru aðskildir og nemendur þjálfist í verklagi samvinnunáms við úrlausn verkefna sem krefjast skipulags og viðbragða á vettvangi.