Um hádegisbil í gær barst lögreglunni á Suðurlandi tilkynning um tvo meðvitundarlausa einstaklinga í tjaldi á tjaldsvæði í Biskupstungum.
Lögregla og sjúkralið voru þegar send á vettvang. Þrátt fyrir endurlífgunartilraunir var karlmaður á áttræðisaldri úrskurðaður látinn á vettvangi. Kona á sjötugsaldri var flutt á gjörgæsludeild þungt haldin.
Lögreglan á Suðurlandi fer með rannsókn málsins. Í tilkynningu frá embættinu segir að málið sé rannsakað sem slys og er meðal annars til skoðunar hvort um gaseitrun hafi verið að ræða.