Dómari við Héraðsdóm Suðurlands féllst í morgun á kröfu lögreglustjórans á Suðurlandi um gæsluvarðhald yfir tveimur karlmönnum sem handteknir voru í tengslum við rannsókn lögreglu á andláti í heimahúsi á Selfossi síðastliðinn fimmtudag.
Eins og fram hefur komið var krafan sett fram fyrir Hérðasdómi Suðurlands í gær og boðaði dómari til þinghalds til að úrskurða um kröfuna á ellefta tímanum í morgun. Mennirnir voru úrskurðaðir í gæsluvarðahald til 5. maí næstkomandi á grundvelli rannsóknarhagsmuna.
Í tilkynningu frá lögreglunni segir að rannsókn lögreglu haldi áfram af fullum þunga og hefur lögreglustjórinn á Suðurlandi notið aðstoðar m.a. tæknideildar lögreglunnar á höfuðborgarsvæðinu sem og lögreglustjórans á Suðurnesjum. Ekki sé hægt að veita frekari uppýsingar vegna málsins á þessari stundu vegna ríkra rannsóknarhagsmuna.