Sláturtíð gengur vel hjá Sláturfélagi Suðurlands á Selfossi og ætlað er að búið verði að slátra um tuttugu þúsund fjár nú í vikulokin.
Að sögn Einars Hjálmarssonar stöðvarstjóra er reiknað með að alls verði slátrað um hundrað þúsund fjár þetta haustið.
Slátrun hófst að mestu þann. 8. september og stendur fram í fyrstu vikuna í nóvember. Að jafnaði er slátrað um 2.400 lömbum á dag. Að sögn Einars hófst slátrun nokkru seinna nú en hefur verið undanfarin ár.
Einar segir fallþunga góðan, meðaltalið sé rúmlega sextán kíló það sem af er. „Það er í hærri kantinum.“
Um 130 manns starfa í sláturhúsinu á Selfossi yfir háannatímann.