Færsla Markarfljóts hefst í janúar

Sveitarstjórn Rangárþings eystra hefur heimilað Siglingastofnun að ráðast í gerð bráðabirgða flóðvarnargarða við ósa Markarfljóts.

Leyfið er veitt með samþykki landeigenda og er gert ráð fyrir að framkvæmdir hefjist fljótlega eftir áramót.

Frá þessu er greint á vef Frétta í Vestmannaeyjum.

Dýpkunarskip Íslenska gámafélagsins, Scandia, átti að hefja vinnu við dýpkun hafnarinnar í byrjun janúar en vegna tafa á viðgerð á skipinu mun það dragast. Skipið fer í skoðun í Danmörku 10. janúar og mun ekki hefja dýpkun fyrr en seinni hluta janúarmánaðar.

Landeyjahöfn hefur verið opin í desember en lægðir sem koma upp að landinu á annan og þriðja dag jóla eru líklegar til að valda róti við höfnina þannig að hún lokist og ef svo fer verður hún lokuð þar til Scandia getur athafnað sig.