Erlendur ferðamaður lést í Silfru

Kl. 13:16 í dag var björgunarlið og lögregla kallað að Silfru í þjóðgarðinum á Þingvöllum vegna meðvitundarlauss manns. Um var að ræða erlendan ferðamann sem var í átta manna hópi undir leiðsögn leiðsögumanna við snorkl í vatninu.

Þegar maðurinn kom að bakkanum að loknu sundinu missti hann meðvitund og var strax komið upp á bakkann þar sem leiðsögumenn hófu endurlífgun en hópurinn var með búnað til súrefnisgjafar og hjartastuðtæki með sér eins og skylt er fyrir þá sem fara með hópa í gjánna.

Endurlífgun var haldið áfram þar til komið var með sjúklinginn með þyrlu LHG á sjúkrahús í Reykjavík en þar var hann úrskurðaður látinn. Dánarorsök liggur ekki fyrir.

Viðbragðsaðilum, leiðsögumönnum og samferðamönnum mannsins var boðið upp á viðrunarfundi eftir atvikið af hálfu Rauðakross Íslands og áfallateymis Heilbrigðisstofnunar Suðurlands.