Samkvæmt gögnum frá Veðurstofu Íslands er ennþá hætta á berghruni úr suðurhlið Reynisfjalls. Ákveðið hefur verið að halda austasta hluta Reynisfjöru lokuðum enn um sinn.
Svæðið verður vaktað og lokunarborði til staðar en áfram verður unnið að útfærslu á frekari lausn að lokun á þessum hluta fjörunnar.
Lögreglan telur mikilvægt að koma fræðslu og upplýsingum á framfæri við gesti svæðisins og því verður farið í vinnu við uppfærslu og samræmingu aðvörunarskilta sem standa við göngustíginn sem liggur niður í fjöruna.
Þetta kemur fram í fréttatilkynningu sem lögreglan sendi út eftir fund með rekstraraðilum í Svörtu Fjöru, hluta landeigenda í Reynisfjöru, sveitarstjóra Mýrdalshrepps, fulltrúum Veðurstofunnar og Vegagerðarinnar.