Gert er ráð fyrir að um mitt næsta ár hefjist fyrsti áfangi framkvæmda við endurbætur og viðbyggingu húsnæðis Heilbrigðisstofnunar Suðurlands á Selfossi. Þegar framkvæmdir hefjast verður hjúkrunardeildinni Ljósheimum þar sem eru 20 hjúkrunarrými lokað og starfsemi heilsugæslunnar færð þangað en engar breytingar verða á rekstri Fossheima.
Þetta kemur fram í tilkynningu frá Heilbrigðisráðuneytinu.
Þegar nær dregur lokun Ljósheima verður hætt að taka við nýjum íbúum inn á hjúkrunardeildina þegar rými losna. Þegar rekstri deildarinnar verður svo hætt um mitt næsta ár verður íbúunum sem þar búa boðinn flutningur á annað hjúkrunarheimili. Þar koma til greina hjúkrunardeildin Fossheimar og hjúkrunarheimilið Móberg á Selfossi og hjúkrunarheimilið Ás í Hveragerði, eða annað hjúkrunarheimili í samráði við óskir íbúa.
„Stjórnendur og starfsfólk HSU leggja metnað sinn í vandaðan undirbúning fyrir lokun Ljósheima að ári þannig að sem minnst rask verði á högum íbúa hjúkrunardeildarinnar og aðstandenda þeirra. Enginn þarf að óttast að vera skilinn frá maka sínum eða gert að flytja á hjúkrunarheimili um langan veg fjarri sinni heimabyggð,“ segir í tilkynningu ráðuneytisins.
Hjúkrunarrýmum á Suðurlandi fjölgar
Þrátt fyrir lokun Ljósheima mun hjúkrunarrýmum ekki fækka á Suðurlandi en um mitt næsta ár verður opnað nýtt hjúkrunarheimili Áss í Hveragerði. Með þeirri framkvæmd fjölgar hjúkrunarrýmum þar um 26.
Landspítalinn hafði til skamms tíma forgang að 40 af 60 hjúkrunarrýmum á Móbergi vegna skorts á hjúkrunarrýmum á höfuðborgarsvæðinu. Þessi forgangur Landspítala að rýmum á Móbergi er ekki lengur fyrir hendi eftir opnun 100 rýma í Urðarhvarfi síðastliðið vor og því mun Móberg nýtast íbúum Suðurlands í auknum mæli.