Stjórnendur Barnaskólans á Eyrarbakka og Stokkseyri fengu símtal frá Almannavörnum á ellefta tímanum í kvöld þar sem tilkynnt var um smit í nemendahópi Barnaskólans á Eyrarbakka og Stokkseyri.
Eftir ráðleggingar frá Almannavörnum ákvað stjórnendateymi skólans að fella niður skólahald á morgun, föstudag, auk þess sem frístund verður lokuð. Litlu jólin, sem halda átti á morgun falla því niður.
„Það tekur okkur sárt að þurfa að grípa til þessara ráðstafana en við látum nemendur og starfsfólk njóta vafans með þessari ákvörðun, eins og við höfum gert hingað til í ákvörðunum varðandi C19. Þetta er heldur snautlegur endir á skólastarfi ársins og viljum við biðja forráðamenn fyrir kveðjum til nemenda þar sem við ætluðum að kveðja þá fyrir jólaleyfi á morgun,“ segir meðal annars í tilkynningu frá stjórnendum BES.
Mikilvægt er fyrir nemendur og aðstandendur fari gætilega næstu dagana og í sýnatöku ef vart verður við einkenni. Ef einhver börn hafa verið útsett fyrir smiti mun rakningarteymi hafa samband við aðstandendur.