Engin breyting í Ölfusinu

Bæjaryfirvöld í Ölfusi og forsvarsmenn Thorsil ehf sendu frá sér tilkynningu í dag vegna fréttaflutnings RÚV í gær.

Í hádegisfréttum RÚV í gær var sagt að fyrirhuguð verksmiðja yrði reist í Grindavík en ekki Ölfusi. Áform Thorsil eru hinsvegar óbreytt eins og sunnlenska.is greindi frá í gær.

Sigríður Lára Ásbergsdóttir, forseti bæjarstjórnar Ölfuss og Eyþór Arnalds, framkvæmdastjóri Thorsil, sendu frá sér eftirfarandi fréttatilkynningu í dag þar sem þetta er ítrekað.

„Í tilefni fréttar Ríkisútvarpsins í gær og í dag um að fyrirhuguð kísilmálmverksmiðja í Þorlákshöfn yrði staðsett i Grindavík en ekki Þorlákshöfn vilja bæjaryfirvöld í Ölfusi og forsvarsaðilar Thorsil ehf upplýsa að engar breytingar hafa orðið á þeirri fyrirætlan Thorsil ehf að staðsetja verksmiðju sína í Þorlákshöfn. Unnið er að verkefninu samkvæmt áætlun, þ.m.t. úthlutun lóðar fyrir starfsemina og gert er ráð fyrir að á næstunni hefjist grunnrannsóknir vegna fyrirhugaðs umhverfismats.“