Engar vísbendingar um eldgos

Síðustu dagana hafa GPS-landmælingatæki á Heklusvæðinu sýnt óvanalegar jarðskorpuhreyfingar sem túlka má sem afleiðingu af kvikuhreyfingum djúpt í rótum fjallsins.

Í tilkynningu frá Almannavörnum nú síðdegis kemur fram að engir jarðskjálftar hafa fylgt þessum færslum og jarðskorpuhreyfingarnar hafa að nokkru gengið til baka. Engin merki sjást um yfirvofandi eldgos. Þrýstingur í kviku undir Heklu hefur vaxið síðan í síðasta gosi og nú síðustu ár hefur hann verið svipaður eða hærri en á undan síðustu gosum. Því verður að telja að eldstöðin sé tilbúin í gos.

Í síðustu eldgosum hafa jarðskjálftar mælst um eina klukkustund á undan þeim og þegar síðast gaus í Heklu gátu vísindamenn spáð fyrir um gosið með um einnar klukkustundar fyrirvara. Vegna þessara skömmu fyrirvara er full ástæða fyrir fólk að hafa allan vara á í nágrenni Heklu, nú sem endranær, segir í tilkynningu Almannavarna.

Hekla og nágrenni hennar eru mjög vinsæl til útivistar en frá fjallinu er mjög gott útsýni í góðu skyggni. Það er ágæt regla fyrir þá sem ætla á fjallið að fá ættingja eða vini til þess að fylgjast með fjölmiðlum á meðan á göngunni stendur. Ef vísbendingar koma um að gos sé að hefjast í Heklu er þeim upplýsingum komið til fjölmiðla eins fljótt og hægt er og geta þá ættingja og vinir hringt í göngumenn og komið boðum til þeirra.

Almannavarnir ítreka að þó svo að fjallið sé komið á tíma sjá vísindamenn ekki neinar sérstakar vísbendingar sem benda til þess að gos sé yfirvofandi.