Elti sjúkrabíl í forgangsakstri

Lögreglan við Lómagnúp. Mynd úr safni. Ljósmynd/Lögreglan á Suðurlandi

Lögreglan á Suðurlandi hafði í gær afskipti af ökumanni fólksbifreiðar sem hafði tekið þá ákvörðun að elta sjúkrabifreið sem var í forgangsakstri eftir Suðurlandsvegi.

Sjúkrabifreiðinni var ekið með bláum forgangsljósum og var alveg sama á hvaða hraða sjúkrabifreiðinni var ekið, alltaf fylgdi umræddur ökumaður á eftir eins og skugginn.

Lögreglan stöðvaði ökumanninn og var hann kærður fyrir hraðakstur og fékk alvarlegt tiltal vegna athæfisins. Lögregla lítur málið mjög alvarlegum augum en fyrir utan hraðaksturinn þarf ekki að fjölyrða um þá hættu er umræddur ökumaður skapaði með athæfi sínu.

Ætlaði að skjótast hringinn og taka myndir
Þá stöðvaði lögreglan á Suðurlandi erlendan ferðamann á 145 km/klst hraða á klst á Suðurlandsvegi milli Víkur og Kirkjubæjarklausturs síðastliðna nótt. Gaf ökumaður þá skýringu að hann ætti bókað flug frá Íslandi í dag en hann ætlaði að aka hringinn og taka nokkrar ljósmyndir. Þar sem ökumaðurinn var á á leið til austurs var honum bent á að skynsamlegra væri að snúa við og aka til vesturs ef hann ætlaði sér að ná umræddu flugi.