Ellý Tómasdóttir, bæjarfulltrúi Framsóknarflokksins í Árborg, sækist eftir 2. sæti á lista Framsóknar fyrir komandi sveitarstjórnarkosningar.
Framsóknarfélag Árborgar mun halda lokað, rafrænt prófkjör í byrjun mars þar sem kosið verður um þrjú efstu sæti listans.
Ellý skipaði 2. sætið á lista Framsóknar í kosningunum 2022 og hefur gegnt starfi bæjarfulltrúa síðan þá. Hún segist hafa öðlast mikla og dýrmæta reynslu á þessum tíma. Starfið hafi verið lærdómsríkt og kennt henni mikilvægi samvinnu, opins samtals og lausnamiðaðra vinnubragða í þágu íbúanna.
„Ég brenn fyrir málefnum íbúanna og hef einlægan vilja til að leggja mitt á vogarskálarnar til að gera samfélagið okkar enn betra. Með því að gefa kost á mér að nýju vil ég halda áfram að vinna að öflugu og traustu sveitarfélagi þar sem tekið er vel utan um fólk á öllum stigum lífsins,“ segir Ellý.
Hún hefur búið í sveitarfélaginu frá sumrinu 2014 og segist þekkja vel hvernig það er að koma ný inn í samfélag með lítið bakland og tengslanet.
„Á þessum tíma hefur Árborg vaxið og þróast gríðarlega og orðið að okkar heimili. Öll börnin mín hafa verið í leik- og grunnskóla í Árborg og í dag á ég tvö börn í grunnskóla og eitt í framhaldsskóla. Þessi reynsla hefur veitt mér sterka tengingu við skóla-, íþrótta- og tómstundastarf í sveitarfélaginu. Ég hef séð hversu mikilvægt og öflugt þetta starf er fyrir börn, ungmenni og fjölskyldur og hversu stóru hlutverki það gegnir í daglegu lífi samfélagsins. Ég vil leggja mitt af mörkum til að styðja við og efla þetta mikilvæga starf,“ segir Ellý.