Elliði Vignisson, bæjarstjóri í Ölfusi, verður bæjarstjóraefni D-listans í Ölfusi fyrir komandi sveitarstjórnarkosningar.
Elliði, sem er lærður klínískur sálfræðingur, hefur gegnt embætti bæjarstjóra í Ölfusi frá árinu 2018 og hefur rúmlega 25 ára reynslu af sveitarstjórnarmálum, meðal annars sem fyrrverandi bæjarstjóri Vestmannaeyja til 12 ára.
„Á hans tíma hefur Ölfus lagt áherslu á ábyrga fjármálastjórn, fjölgun íbúa, uppbyggingu innviða og stóraukna þjónustu við íbúa. D-listinn veit að reynsla Elliða, þekking á rekstri sveitarfélagsins og skýr sýn á áframhaldandi uppbyggingu geri hann að sterkum kosti til að leiða Sveitarfélagið Ölfus næsta kjörtímabil,“ segir í tilkynningu frá framboðinu.
Flokkurinn mun á næstu vikum kynna nánar áherslur sínar undir kjörorðunum „Áfram af ábyrgð“.