Samtök sunnlenskra sveitarfélaga fengu tvo styrki þegar innviðaráðherra úthlutaði samtals 170 milljónum króna til fjórtán fjölbreyttra verkefna til að efla viðkvæmar byggðir landsins.
Verkefnið Söguslóðir Suðurlands fékk 6,5 milljón króna styrk og markaðssetning og miðlun fyrir Eldfjallaleiðina fékk 4,5 milljón króna styrk.
Verkefnið Söguslóðir Suðurlands felst í þróun heildstæðrar sögutengdrar ferðaleiðar til að styrkja atvinnulíf í dreifðum byggðum með því að lengja dvöl gesta, fækka dagsferðum og auka staðbundna verðmætasköpun. Leiðin verður sett fram á vef og stafrænu korti og byggir á kortlagningu og varðveislu sagna og söguslóða sem nýtast til langs tíma í þróun ferðaþjónustu og atvinnuuppbyggingar í heimabyggð.
Eldfjallaleiðin er samstarfsverkefni Markaðsstofu Reykjaness og Markaðsstofu Suðurlands sem miðar að því að miðla þekkingu um eldvirkni, áhrif hennar á náttúru og samfélög og skapa virðisaukandi tækifæri í ferðaþjónustu. Ferðaleiðin var þróuð af íbúum og ferðaþjónstuaðilum. Styrkurinn verður nýttur til að fjármagna markaðssetningu, samræmda framsetningu og þróun verkfæra sem styðja ferðaþjónustuaðila, sveitarfélög og gesti með aðlaðandi, jákvæðri og uppbyggilegri miðlun.
Styrkirnir frá innviðaráðuneytinu koma af byggðaáætlun en alls bárust 28 umsóknir fyrir um 756 milljónir króna. Þetta er hæsta úthlutun úr þessari aðgerð á tímabili gildandi byggðaáætlunar. Verkefni sem talin eru hafa varanleg áhrif, eru atvinnuskapandi og hvetja til nýsköpunar eru í forgangi við úthlutunina.