Eldur kviknaði í örbylgjuofni

Slökkviliðsmenn frá Brunavörnum Árnessýslu á Selfossi reykræstu íbúð í parhúsi á Selfossi í gær eftir að eldur hafði komið upp í örbylgjuofni.

Málsatvik voru þau að börn voru að hita sér mat á plastdisk í örbylgjuofninum og höfðu matinn heldur lengi í ofninum þannig að það kviknaði í ofninum.

Búið var að slökkva eldinn þegar að slökkviliðsmenn komu á vettvang en þeir aðstoðuðu hinsvegar við reykræstingu og gengu úr skugga um að ekki leyndist glóð í eldhúsinnréttingunni með hitamyndavél.