Brunavarnir Árnessýslu fengu tilkynningu um eld í iðnaðarhúsnæði í Þorlákshöfn rétt um hádegi í dag.
Vegfarandi varð var við reyk utandyra en þegar slökkviliðsmenn bar að garði kom í ljós að eldurinn logaði í lyftara sem stóð úti á gólfi inni í húsinu.
„Það var enginn í húsinu en þarna var töluverður svartur reykur og eldurinn reyndist staðbundinn í lyftaranum. Það gekk vel að slökkva og reykræsta,“ sagði Halldór Ásgeirsson, aðalvarðstjóri Brunavarna Árnessýslu, í samtali við sunnlenska.is.
„Það var lán að þetta varð ekki meira því þetta er stórt hús. Það er tjón á lyftaranum og eitthvað þar í kring en ekki á húsinu sjálfu nema reykskemmdir,“ bætti Halldór við að lokum.
Lögreglan á Suðurlandi rannsakar eldsupptökin.