Eldur í jeppa á Suðurlandsvegi

Slökkviliðsmenn frá Brunavörnum Árnessýslu á Selfossi voru kallaðir út um klukkan hálfeitt í dag þegar tilkynnt var um eld í jeppabifreið á Suðurlandsvegi, rétt austan við Selfoss.

Svo virðist sem olía hafi sprautast á pústgrein bifreiðarinnar undir vélarhlífinni frá götóttri slöngu með þeim afleiðingum að eldur kviknaði.

Ekki var slökkvitæki í bílnum en vegfarandi á öðrum bíl brást skjótt við og slökkti eldinn með slökkvitæki úr sinni bifreið.

Slökkviliðsmenn aftengdu geyma bifreiðarinnar er þeir mættu á staðinn og gengu úr skugga um að ekki leyndist frekari eldur í bílnum.