Eldur kom upp í íbúðarhúsi við Háeyrarvelli á Eyrarbakka rétt fyrir klukkan ellefu í morgun. Mikill reykur var í húsinu en búið er að slökkva eldinn og verið er að reykræsta húsið.
Húsið var mannlaust þegar eldurinn kom upp en Neyðarlínan fékk tilkynningu kl. 10:48 í morgun um að húsið væri fullt af reyk. Slökkvilið Brunavarna Árnessýslu á Selfossi fór á vettvang ásamt lögreglu og sjúkraliði.
Við fyrstu sýn er talið að eldurinn hafi kviknað út frá þvottavél en vettvangsannsókn hefst um leið og slökkvistarfi lýkur.