Eldur í gróðurhúsi

Slökkvilið Brunavarna Árnessýslu á Selfossi, Laugarvatni og í Reykholti voru kölluð út laust fyrir klukkan 6 í morgun þegar eldur kom upp í gróðurhúsi á Böðmóðsstöðum í Laugardal.

Samkvæmt upplýsingum frá lögreglunni á Selfossi logaði eldur í tveimur gróðurhúsalömpum.

Greiðlega gekk að slökkva eldinn en að því loknu þurfti að reykræsta gróðurhúsið.

Í húsinu var tómataræktun og er líklegt að plöntur hafi skemmst því mikill reykur var í gróðurhúsinu.