Eldur í garðyrkjustöð í Hveragerði

Eldur kom upp í garðyrkjustöð í Hveragerði laust fyrir miðnætti síðastliðið laugardagskvöld. Eldurinn var staðbundin á rækturnarborði í einu af gróðurhúsum stöðvarinnar.

Ræktunarborðin eru svokölluð flóð- og fjöru vökvunarborð sem gerð eru úr plastefnum. Svo virðist sem kviknaði hafi í einu borðinu út frá rafmagnsbúnaði með þeim afleiðingum að hluti af borðinu brann og húsið fylltist af reyk.

Er slökkviliðsmenn frá Brunavörnum Árnessýslu komu á vettvang var lögreglumaður, sem reyndar er líka hlutastarfandi slökkviliðsmaður hjá BÁ, búinn að slökkva eldinn með slökkvitæki úr lögreglubílnum.

Slökkviliðsmenn BÁ reykræstu síðan gróðurhúsið og afhentu lögreglu formlega vettvanginn til rannsóknar.

Ekki er vitað á þessari stundu hversu mikið tjón hlaust af eldinum en ljóst er að allnokkuð ræktunartjón hefur orðið þar sem framleiðsla á matvöru fer fram í húsinu.