Eldur kviknaði á veitingastaðnum Fröken Selfoss í miðbæ Selfoss í morgun. Reykkafarar frá Brunavörnum Árnessýslu fóru inn í húsið og slökktu eldinn en reykræsting tók talsverðan tíma.
Að sögn Péturs Péturssonar, slökkviliðsstjóra Brunavarna Árnessýslu, var ekki mikill eldur inni á staðnum en gríðarlegur reykur. Iðnaðarmenn í miðbænum urðu varir við að reykur kæmi upp um lofttúðu um klukkan 8 í morgun og tilkynntu um eldinn.
„Þegar við komum á staðinn þá er veitingastaðurinn alveg fullur af reyk og sést ekkert inn. Það var ekki mikið tjón vegna elds en það er væntanlega mikið hreinsunarstarf framundan vegna sóts og reykskemmda,“ bætir Pétur við.
Lögreglan á Suðurlandi rannsakar upptök eldsins.