Vinningshafarnir sem áttu milljónamiðann í EuroJackpot í síðustu viku eru eldri hjón sem keyptu miðann sinn í N1 við Austurveg á Selfossi. Vinningurinn hljóðaði upp á rúmar 336 milljónir króna.
Þau komu við á skrifstofu Getspár í vikunni til þess að sækja stóra vinninginn.
Maðurinn fór sjálfur yfir miðann eftir að hafa heyrt að 2. vinningur hefði komið til landsins. Þegar hann sagði eiginkonu sinni frá vinningnum trúði hún honum ekki í fyrstu og var sannfærð um að hann væri einfaldlega að grínast.
Hjónin sögðust þegar telja sig rík, enda eiga þau bæði mörg börn og enn fleiri barnabörn og lögðu áherslu á að það skipti þau mestu máli. Þau sögðust strax hafa ákveðið að deila gleðinni með sínum nánustu, enda gæfi það þeim enn meira að sjá börnin og barnabörnin njóta góðs af vinningnum.
Barnabörnin eru ýmist að stíga sín fyrstu skref á húsnæðismarkaði eða í námi, og því mun vinningurinn skipta sköpum fyrir marga í fjölskyldunni.