Ekki lengur vambir með slátrinu frá SS

Sláturfélag Suðurlands hefur hætt að bjóða upp á kalóneraðar vambir, og í stað þess er boðið upp á saumaða próteinkeppi sem einungis þarf að bleyta upp í vatni áður en þeir eru fylltir og saumað fyrir.

„Vinnsla á kalónerðum vömbum er mjög kostnaðarsöm og hefur farið minnkandi ár frá ári. Sífellt fleiri hafa kosið próteinkeppina undanfarin ár, enda einfaldari og hreinlegri útfærsla,“ segir Guðmundur Svavarsson, framleiðslustjóri SS á Hvolsvelli aðspurður um málið.

„Stemmingsmál“
Einhverjir hafa lýst óánægju sinni með þá ákvörðun SS að hætta með vambirnar. „Við skiljum fullkomlega að neytendur sakni gömlu kalóneruðu vambanna. Sumir telja það ákveðið „stemmingsmál” að skafa og sníða vambir og sauma keppi. Raunin er hinsvegar sú að sala hefur farið minnkandi ár frá ári, vinnslan er kostnaðarsöm, tækjabúnaður úreltur og verkkunnátta í fornum vinnsluaðferðum þverrandi,“ segir Guðmundur.

„Við teljum okkur bjóða upp á betri lausn sem notið hefur sívaxandi vinsælda og tekið skal fram að ekki er um gerviefni að ræða, heldur keppi sem unnir eru úr náttúrulegu dýrapróteini og eru ætir,“ bætir hann við.

Guðmundur segir umrædda próteinkeppi vera ákaflega handhæga. „Enda hafa þeir um árabil verið notaðir við framleiðslu á tilbúnu slátri hjá okkur og öðrum framleiðendum hér heima og erlendis með góðum árangri. Allt slátur sem þú kaupir út í búð er í svona keppum. Eftir sem áður eru sköpuð verðmæti úr kindavömbunum þótt þær fari í annan farveg, engu er hent“, segir Guðmundur.