Annan hvern miðvikudag klukkan 17:30 safnast hópur karla saman að Eyravegi 31 á Selfossi. Hópurinn hefur hist síðan í byrjun árs 2021 og hefur tilkoma hans haft mikil áhrif á þá sem fundina sækja.
Félagskapurinn kallar sig Smárana og er stuðningshópur karla sem hafa greinst með krabbamein en hópurinn hittist í húsnæði Krabbameinsfélags Árnessýslu.
„Það kom fyrirspurn til okkar hvort hægt væri að hafa sér hitting fyrir karla og við ákváðum að gera það enda alltaf opin fyrir hugmyndum sem geta á einhvern hátt létt okkar félagsmönnum að takast á við krabbamein,“ segir Högni Jóhann Sigurjónsson, umsjónarmaður hópsins, í samtali við sunnlenska.is
„Sumum körlum getur reynst erfitt að tala um sín veikindi fyrir framan ókunnuga og þá sér í lagi ef um er að ræða krabbamein í blöðruhálskirtli og svo er bara gott að spegla sig í öðrum sem eru í sömu baráttu. Það eina sem sófinn heima hefur umfram það að hitta mennina er að hann steinþegir, ef það er þá kostur.“
Gott að fara út úr húsi og hitta fólk
Högni segir að í erfiðum veikindum sé mikilvægt að geta talað við einhvern sem er ótengdur manni. „Það er þannig, hvort heldur það er karl eða kona sem lendir í því að þurfa að berjast við lífsógnandi sjúkdóm, að það er ekki í lagi að sturta í tíma og ótíma öllum sínum erfiðu hugsunum og verkjasögum yfir fólkið sitt. Það þarf samt að tala um það og þá er gott að fara út úr húsi og hitta fólk sem þekkir tilfinninguna og getur spjallað um hugsanir, verki og fleira. Stundum er gott að tala jafnvel bara um veðrið og daginn og veginn.“
„Við erum með opið hús hjá Krabbameinsfélagi Árnessýslu að Eyravegi 31 mánudaga og miðvikudaga á milli klukkan 11 og 14 og á föstudögum klukkan 11 til 13. Það er hægt að ná sambandi við okkur á netfanginu arnessysla@krabb.is og í síma 482 1022. Við erum einnig með Facebook síðuna, Krabbameinsfélag Árnessýslu. Ég hvet fólk sem hefur kynnst krabbameini á einhvern hátt til að kynna sér starfsemi félagsins,“ segir Högni að lokum.
