Aðeins eitt tilboð barst í endurgerð á ráðhúströppunum við Ráðhús Árborgar á Selfossi sem vinna átti að í sumar og var það 58% yfir kostnaðaráætlun verksins.
Vörðufell ehf á Selfossi bauð rúmlega 109,7 milljónir króna í verkið en kostnaðaráætlun sveitarfélagsins hljóðar upp á rúmlega 69,3 milljónir króna.
Eigna- og veitunefnd Árborgar samþykkti að hafna tilboði Vörðufells en nefndin hefur heimild til að hafna tilboðum sem eru yfir 10% af kostnaðaráætlun.
Verkið verður boðið aftur út i haust og því ljóst að ekkert verður af endurgerðinni í sumar en tröppurnar áttu að vera tilbúnar þann 1. október næstkomandi.