Ekki frekari skoðun á seyrulosun

Grímsnes- og Grafningshreppur telur sig ekki þurfa að grípa til frekari aðgerða eftir að í ljós komu óvönduð vinnubrögð við dælingu seyruvökva milli bíla í sumarhúsahverfum í hreppnum.

Heilbrigðiseftirlit Suðurlands rannsak­aði þrjá staði að beiðni Grímsnes- og Grafningshrepps þar sem kvartanir höfðu borist sveitar­félaginu vegna hreinsibíla, sem höfðu staðið á viðkomandi stöðum yfir nótt eða í nokkra daga meðan á vinnu Holræsa- og stífluþjónustu Suðurlands stóð á svæðinu. Óþarfi reyndist að taka sýni til rannsókna þar sem gróður var svo gróskumikill að allt benti til losunar á áburðarmiklum efnum eins og grá- eða siturvatni.
Líkt og kunnugt er þá veitti Heilbrigðiseftirlitið fyrirtækinu form­­lega áminningu í ágúst sl. vegna losunar seyruvökva á vatnsverndar­svæði Þingvalla auk þess sem fyrirtækinu var gert að skila inn mánaðarlegum upplýsingum um starfsemi sína og það sett undir sérstakt eftirlit.
Birgir Þórðarson hjá Heilbrigðis­eftirliti Suðurlands sagði í samtali við Sunnlenska að fyrirtækið hefði þurft að nota litla dælubíla til að komast um þröngar götur að sumarbústöðunum. Því var dælt yfir á tankbíla af minni hreinsibílum á viðkomandi stöðum. Ummerkin í gróðrinum stöfuðu af óvönduðum vinnubrögðum við dælingu seyru­vökva á milli bílanna. Heilbrigðis­eftirlitið hefur gert kröfu um bætt verklag og meiri nákvæmni í vinnubrögðum. Tók Birgir fram að fyrirtækið hafi tekið ábendingarnar alvarlega og að allt eftirlit hafi verið unnið í góðu og fullu samstarfi.
Grímsnes- og Grafningshreppur telur sig ekki þurfa að grípa til frekari aðgerða. Að sögn Gunnars Þorgeirssonar oddvita rennur samningur við Holræsa- og stífluþjónustu Suðurlands út um næstu áramót. Verður þá farið í nýtt útboð og átti Gunnar von á að kröfur yrðu talsvert stífari í ljósi undan­genginna atburða. Einnig væri ætlunin að semja við heilbrigðis­eftirlitið um vöktun á nýjum þjónustuaðila.
Talsmaður Holræsa- og stíflu­þjónustu Suðurlands neitaði að tjá sig um málið þegar Sunnlenska hafði samband við hann.