Samhliða sveitarstjórnarkosningunum gátu íbúar í Flóahreppi tekið þátt í könnun um hug íbúa til sameiningar sveitarfélaga.
Ekki var um formlega íbúakosningu að ræða heldur óformlega könnun og eru niðurstöðurnar því ráðgefandi fyrir nýja sveitarstjórn.
Hulda Kristjánsdóttir, sveitarstjóri, sagði í samtali við sunnlenska.is í morgun að niðurstöður könnunarinnar bíði nýrrar sveitarstjórnar að vinna með í upphafi kjörtímabils.
„Kjörkassinn með könnuninni er því enn innsiglaður og ekki enn farið að skoða niðurstöðurnar. Ég reikna með að sveitarstjórn muni taka niðurstöðurnar fyrir á sveitarstjórnarfundi og í kjölfarið verða þær birtar öllum áhugasömum,“ segir Hulda.