Ekki verður auglýst eftir nýjum sveitarstjóra í Ásahreppi en Valtýr Valtýsson lét af störfum í lok síðasta kjörtímabils sveitarstjórnar. Skrifstofustjóri hefur verið ráðinn og starfshlutfall oddvita hefur verið aukið.
Guðmundur Einarsson var ráðinn skrifstofustjóri í vor en hann hefur fjölbreytta starfsreynslu að baki og hefur síðustu ár unnið hjá Borgarskjalasafni Reykjavíkur við innleiðingu og rekstur umsýslukerfis. Hann hefur reynslu af sveitarstjórnarmálum en hann var oddviti Hraungerðishrepps eitt kjörtímabil.
Á fyrsta fundi kjörtímabilsins var Ísleifur Jónasson kosinn oddviti og mun hann í framhaldinu verða með aukna viðveru á skrifstofu hreppsins og meðal annars bjóða upp á viðtalstíma eftir hádegi á miðvikudögum á Laugalandi.
Starfshlutfall oddvitans eykst úr 25% í 40% og í ljósi þess að umfang embættisins hefur aukist samþykkti hreppsnefndin að þóknun hans aukist í samræmi við það. Fundum hreppsnefndar verður einnig fjölgað úr einum í mánuði í tvo og þóknun hreppsnefndarfulltrúa hækkuð úr 8% í 10% af þingfararkaupi.