Ekki aka utan vega!

Nú þegar vorið er á næsta leiti, aukast ferðir manna um hálendið.

Af því tilefni vill Ferðaklúbburinn 4×4 vekja athygli jeppaeigenda á því að fara sérstaklega varlega á meðan snjóa er að leysa og frost er að fara úr jörðu og virða í einu og öllu bann við hvers konar akstri utan vega.

Á samskiptavefnum Facebook birtist færsla í gær þar sem vakin var athygli á ljótum umhverfisspjöllum eftir utanvegakstur á Úlfarsfelli en þar hefur einhver jeppaeigandi sýnt algert virðingarleysi gagnvart náttúru svæðisins. Það skal sérstaklega tekið fram að umræddur bílstjóri er ekki félagsmaður í Ferðaklúbbnum 4×4.

Í fréttatilkynningu frá klúbbnum segir að þeir ökumenn sem lítilsvirða landið á þann hátt sem sjá mátti á Facebook í gær, spilli alvarlega fyrir málstað þeirra sem vilja ferðast um Ísland með ábyrgum hætti.

Stjórn klúbbsins minnir enn og aftur á að svona umgengni er með öllu ólíðandi og hvetur félagsmenn sína til að berjast gegn ólöglegum utanvegaakstri og tilkynna slíkt ávallt til lögreglu ef þeir verða vitni að slíku.