Lögreglustjórinn á Suðurlandi boðaði alla sveitarstjóra á Suðurlandi auk forsvarsmanna viðbragðsaðila á fund í Björgunarmiðstöðinni á Selfossi í gær til þess að upplýsa um stöðu mála vegna COVID-19.
Grímur Hergeirsson, settur lögreglustjóri á Suðurlandi, fór yfir stöðu mála auk þess sem Hjörtur Kristjánsson, umdæmislæknir sóttvarna á Suðurlandi hélt erindi um veiruna og stöðu mála á henni bæði hérlendis og erlendis.
Eins og staðan var þegar fundurinn var haldinn höfðu 14 einstaklingar á Íslandi verið greindir með veiruna en allir höfðu þeir smitast erlendis. Smitin eru nú orðin 16 talsins á Íslandi en ekki hafa enn komið fram smit sem hafa smitast milli manna hér innanlands.
Ekkert tilfelli hefur enn komið fram á Suðurlandi en þegar það gerist mun aðgerðastjórnstöðin á Selfossi verða mönnuð allan sólarhringinn, viðbragðsaðilum og stjórnendum sveitarfélaga á Suðurlandi til stuðnings og upplýsingargjafar.
Vel var mætt á fundinn sem einnig fór fram í fjarfundakerfi en alls voru níu þátttakendur á fundinum í gegnum slíkan búnað í bæði hljóð og mynd.
Frá þessu er greint á heimasíðu Brunavarna Árnessýslu.