Ekkert frjálsíþróttakaffi á 17. júní

Frjálsíþróttadeild Ungmennafélags Selfoss hefur tekið ákvörðun um að hætta með kaffisölu á 17. júní á Selfossi, sem áratuga hefð er fyrir.

„Við erum öll í stjórninni mjög leið yfir að þurfa að hætta með kaffið,“ segir Helgi Sigurður Haraldsson, formaður frjálsíþróttadeildar Selfoss í samtali við sunnlenska.is.

„Minnkandi aðsókn hefur verið undanfarin ár samhliða því að allur kostnaður hefur aukist verulega, ýmis aðföng sem nauðsynlegt er að kaupa, húsaleiga og fleira.“

„Þetta fjáröflunarverkefni hefur því ekki verið að skila tilætluðum árangri og mun deildin því láta staðar numið. Þökkum öllum sem hafa stutt þetta verkefni undanfarin ár fyrir stuðninginn og ekki síður foreldrum, iðkendum og öðrum fyrir aðstoðina,“ segir Helgi að lokum.