Ekkert ferðaveður milli Seljalands og Víkur

Ekkert ferðaveður er nú undir Eyjafjöllum, frá Seljalandi og að Vík, en mikið hvassviðri er þar og getur verið hættulegt fyrir stóra bíla að vera á ferðinni.

Lögreglan á Hvolsvelli biður vegfarendur um að fylgjast vel með veðurfréttum næstu tvo sólarhringa.

Veðurstofan varar við norðan vonskuveðri á öllu landinu næstu tvo sólarhringa. Búast má við norðanstormi með vindhraða á bilinu 20-28 m/s um allt land og mjög hvassar vindhviður, allt að 55 m/s, við fjöll, einkum á sunnanverðu landinu.

Ekkert ferðaveður verður næstu tvo sólarhringa, en veður gengur niður seinni part laugardags.