Þrengslavegi var lokað á ellefta tímanum í morgun eftir að ekið var á ökumann flutningabíls efst í Lyngbrekku.
Mikil hálka var á veginum og hafði maðurinn lent í vandræðum vegna hálkunnar og stóð fyrir utan bílinn sinn þegar annar bíll kom að og lenti á manninum.
Lögreglan, sjúkraflutningar HSU og björgunarsveitarfólk fór á vettvang slyssins.
Samkvæmt upplýsingum frá lögreglunni á Suðurlandi er ekki talið að maðurinn sé alvarlega slasaður.
Vegurinn var opnaður aftur laust fyrir klukkan 13.