Eiríkur Vilhelm Sigurðarson, verksmiðjustjóri Samverks á Hellu, hefur ákveðið að ganga til liðs við Á-listann í komandi sveitarstjórnarkosningum.
Áður höfðu Eggert Valur Guðmundsson, oddviti Á-listans og Margrét Harpa Guðsteinsdóttir, formaður Byggðarráðs Rangárþings ytra, lýst því yfir að þau gefi kost á sér áfram en Eggert Valur sækist eftir því að leiða listann.
Félagar í Á-listanum vinna nú að uppstillingu á listann og ætti hann að verða tilbúinn á næstu vikum.
Eiríkur Vilhelm, sem er ferðamálafræðingur með meistarapróf í verkefnastjórnun, þekkir vel til í sveitarfélaginu en hann ók við starfi markaðs- og kynningarfulltrúa í Rangárþingi ytra árið 2015. Allar götur síðan hefur hann sinnt margvíslegum störfum og verkefnum í sveitarfélaginu.
Hann er formaður Hestamannafélagsins Geysis og sat í framkvæmdastjórn Landsmóts hestamanna á Rangárbökkum árið 2022. Eiríkur var framkvæmdastjóri hinnar eftirminnilegu Njáluvöku á Hellu og Hvolsvelli sl. sumar sem hátt í tíu þúsund manns sóttu heim.
„Ég gef kost á mér vegna þess að ég sé ýmis tækifæri sveitarfélagsins til áframhaldandi sóknar, jafnt í bættri þjónustu við íbúana sem og sterkari umgjörð fyrir blómlegt atvinnulíf. Ég er sannfærður um að menntun mín og reynsla af atvinnurekstri annars vegar og hins vegar þekking mín á aðstæðum og þörfum ungra fjölskyldna geti orðið mér dýrmætt veganesti í brýnum framfaraskrefum í samfélagi okkar,“ segir Eiríkur Vilhelm.