Eiríkur Vilhelm Sigurðarson og Eggert Valur Guðmundsson, oddviti sveitarstjórnar Rangárþings ytra, undirrituðu í dag ráðningarsamning Eiríks sem sveitarstjóra en hann mun hefja störf mánudaginn 15. júní.
Eiríkur þekkir sveitarfélagið vel eftir ríflega áratugslanga búsetu og fjölbreytt störf í samfélaginu. Hann er fæddur og uppalinn í Vík í Mýrdal en hefur búið í Rangárþingi ytra ásamt eiginkonu sinni, Heklu Katharínu Kristinsdóttur, og þremur börnum þeirra um árabil. Fjölskyldan býr í Árbæjarhjáleigu og segir Eiríkur reynslu sína af fjölskyldulífi í sveitarfélaginu hafa veitt sér mikilvæga innsýn í þarfir ungs fjölskyldufólks og mikilvægi öflugrar þjónustu við íbúa.
Hann er menntaður ferðamálafræðingur frá Háskólanum á Hólum og lauk síðar meistaragráðu í verkefnastjórnun frá Háskólanum í Reykjavík.
Eiríkur starfaði áður við uppbyggingu Kötluseturs í Vík áður en hann tók við starfi markaðs- og kynningarfulltrúa Rangárþings ytra árið 2015. Frá þeim tíma hefur hann komið að fjölmörgum verkefnum og störfum innan sveitarfélagsins og atvinnulífsins á svæðinu.
Samhliða því hefur Eiríkur verið virkur í félags- og menningarlífi héraðsins. Hann er formaður Hestamannafélagsins Geysis, sat í framkvæmdastjórn Landsmóts hestamanna árið 2022 og hefur frá árinu 2023 stýrt glerverksmiðju Samverks á Hellu. Þá gegndi hann einnig hlutverki framkvæmdastjóra Njáluvökunnar sem haldin var á Hellu og Hvolsvelli síðasta sumar og naut mikillar aðsóknar.
„Ég er mjög sáttur við að hafa fengið Eirík til starfa fyrir sveitarfélagið og hef miklar væntingar til þess að við eigum eftir að eiga gott samstarf um að halda áfram að byggja upp gott samfélag,“ sagði Eggert Valur Guðmundsson oddviti sveitarstjórnar þegar gengið var frá ráðningu Eiríks.
Eiríkur segir fjölmörg tækifæri felast í áframhaldandi uppbyggingu sveitarfélagsins, bæði í þjónustu við íbúa og í eflingu atvinnulífs. Hann leggur áherslu á jákvæða framtíðarsýn, framkvæmdagleði og gott samstarf við starfsfólk, kjörna fulltrúa og íbúa sveitarfélagsins í nýju hlutverki sínu sem sveitarstjóri Rangárþings ytra.