Ársreikningur Hveragerðisbæjar var tekin til fyrri umræðu bæjarstjórnar á fundi hennar í síðustu viku. Niðurstaðan er einstaklega góð og skilar „einstakri rekstrarafkomu“ að sögn meirihlutans.
Rekstrarniðurstaða A hluta var jákvæð um 225 milljónir króna og rekstrarniðurstaða A og B hluta var jákvæð um 175 milljónir kr. Eigið fé sveitarfélagsins í árslok nam rúmum 1,4 milljarði króna samkvæmt efnahagsreikningi fyrir A og B hluta, en eigið fé A hluta nam rúmlega 1,3 milljarði króna.
„Í ársreikningi Hveragerðisbæjar fyrir árið 2024 er að finna afar jákvæða og einstaka rekstrarafkomu bæjarins. Þetta er sérstaklega ánægjuleg niðurstaða í ljósi þess að nú stendur yfir tímabil umfangsmestu fjárfestinga í uppbyggingu innviða og þjónustu í sögu bæjarins,“ segir í bókun meirihlutans.
„Fjárhagsleg staða bæjarins er öflug og stendur vel undir áframhaldandi fjárfestingum í innviðum og þjónustu til bæjarbúa. Samstarf bæjarstjórnar hefur verið gott undanfarið ár og það skiptir miklu máli til að tryggja sem besta útkomu allra bæjarmála, í þágu Hvergerðinga,“ segir ennfremur í bókuninni.
Mikil uppbygging er í gangi í Hveragerðisbæ. Íþróttamannvirki, þriðji áfangi við grunnskólann, viðbygging við leikskóla, gatnagerð og skolphreinsistöð eru allt verkefni á lokametrum framkvæmda eða í framkvæmd.