Verslunin Álnó hefur opnað í verslunarkjarnanum Austurgarði við Larsenstræti 2 á Selfossi.
Álnó, sem upphaflega hét Álnavörubúðin, starfaði í Hveragerði í 38 ár eða þar til húseigandinn sagði upp leigusamningi sínum síðastliðið sumar. Eftir langa leit fann Dóróthea Gunnarsdóttir, eigandi Álnó, núverandi húsnæði við Larsenstræti.
„Það er svo gaman að sitja hérna og sjá út, sjá umferðina, sjá fólk. Það var ekki hægt í Hveragerði, þar var lokað fyrir allt. Ég er rosa glöð með þetta húsnæði. Mér finnst þetta bara eins og happdrættisvinningur að fá þetta húsnæði,“ segir Dóróthea kát þegar blaðamaður sunnlenska.is hitti á hana í búðinni.
Dóróthea segir að hún hafi verið með ákveðnar hugmyndir um það hvernig hún vildi hafa húsnæðið og það tók tíma að finna húsnæði sem hentaði versluninni.
„Ég hefði ekkert farið hvar sem er inn á Selfoss, bara alls ekki. Ég var búin að skoða nokkur húsnæði á Selfossi en mér leist ekki nógu vel á neitt. Ég sá svo að þetta húsnæði er tómt og hafði samband við húseigandann og fékk þau svör að húsnæðið væri ekki laust. En svo losnaði húsnæðið óvænt, mér til mikillar ánægju.“
Enn stærri skódeild
Með breyttu húsnæði breytist vöruúrvalið og segja má að í Álnó á Selfossi fáist nú allt það sem vinsælast var í gömlu Álnó.
„Skódeildin er búin að stækka töluvert mikið. Við erum með mikið úrval af Sketchers skóm sem eru alltaf mjög vinsælir, Vikings, Ecco, Imac, Jódísi, Grisport, Piano, Rieker, Crocs og mikið úrval af stígvélum og fleiri merki. “ segir Dóróthea sem ætlar að prufa að hafa verslunina opna á sunnudögum og sjá hvernig viðtökurnar verða.
„Ég reikna síður með að bjóða upp á tískufatnað heldur einblína meira á góðan útivistarfatnað fyrir alla fjölskylduna allan ársins hring. Ég er til dæmis með Didriksson, Whistler, Athletica, Devold og fleira. Sunddeildin er líka stór og góð hjá okkur og er þar aðallega að finna Arena merkið. Ég er einnig með þó nokkuð úrval af höttum og sixpensum fyrir Volvo eigendur. Svo verð ég bara með íslenska lopann og að sjálfsögðu prjóna og bækurnar,“ segir Dóróthea að lokum.