Í dag var einn aðili til viðbótar handtekinn í þágu rannsóknar málsins og er nú í haldi lögreglu.
Umfangsmikilli rannsókn lögreglunnar á Suðurlandi á máli er varðar frelsissviptingu, fjárkúgun og manndráp miðar vel að sögn lögreglu. Einn aðili til viðbótar var handtekinn í dag og er í haldi lögreglu.
Ekki hefur verið tekin ákvörðun um hvort farið verði fram á gæsluvarðhald yfir honum.
Líkt og fram hefur komið voru þrír aðilar, tveir karlmenn og ein kona, úrskurðuð í vikulangt gæsluvarðhald í héraðsdómi Suðurlands í gær. Við rannsóknina hefur m.a. verið lagt hald á nokkrar bifreiðar, framkvæmdar hafa verið húsleitir og fjöldi vitna hefur verið yfirheyrður.
Rannsókn málsins er enn á frumstigi en almenningur hefur veitt lögreglunni á Suðurlandi gagnlegar ábendingar og myndefni. Áfram verður unnið af kappi við rannsóknina en lögreglan getur ekki veitt frekari upplýsingar um málið að svo stöddu.